Трговскиот дефицит на САД порасна во месец февруари, шести месец по ред, достигнувајќи го највисокото ниво од октомври 2008 година.
Трговскиот дефицит во февруари е зголемен на 57,6 милијарди долари од 56,7 милијарди од јануари, соопшти американското Министерство за трговија, пренесуваат медиумите.
Извозот на стока и услуги достигна рекордни 204,4 милијарди долари, а увозот рекордни 262 милијарди долари.
Дефицитот во трговијата со стока со Кина, како политичко чувствително прашање е намален во февруари на 29,3 милијарди долари од 36 милијарди од јануари.
Кина и САД, двете најголеми светски економии, моментално се вмешани во трговски спор кој ги вознемири инвеститорите ширум светот.
