Државјаните на Албанија не се добредојдени во Белгија за да бараат азил бидејќи оваа држава е безбедна и не ги исполнува потребните критериуми за доделување на статус на азиланти. Оваа порака ја испрати белгискиот државен секретар за азил и миграција Тео Франкен. Повикот го упати при вчерашната посета на Тирана, јавија денеска локалните локалните медиуми.
– Добредојдени сте да студирате, да работите, да ги посетувате вашите семејства, да ги видите Брисел и Бриж, но не барајте азил. Белгија не е златен рудник, од чешмите не тече мед и млеко, потенцираше Франкен. Тој предупреди дека сите кои незаконски ќе влезат во Белгија веднаш ќе бидат протерани.
Државниот секретар потсети дека Албанија е „безбедна земја” чии граѓани не одговараат на критериумите за добивање меѓународна заштита.
Според последните податоци на Евростат, само пет отсто од апликациите на Албанци за азил во ЕУ биле одобрени минатата година.
