Скопските општини во моментот се поделени во одлуките дали средства од нивните буџети да бидат пренаменети на новогодишно празнично украсување, или не.
Од општините Карпош и Аеродром се изјаснија дека ќе ги украсат нивните територии, од Центар велат дека оваа година китењето ќе го остават на кафулињата, рестораните и приватните објекти и парите ќе ги пренаменат за други цели, исто како што направија Кисела Вода и Ѓорче Петров.
Од општина Карпош и општина Аеродром коментираа дека украсувањето ќе биде чисто симболично на неколку пофреквентни локации и ќе биде остварено со намален буџет. Уверуваат дека ќе има доволно средства кои ќе бидат наменети на оние кои им е најпотребно.
Во општините Чаир и Гази Баба во тек се тендерите за набавка на декоративни работи, додека пак, од Градот Скопје се на два ума – дали да ја спроведат јавната набавка со цел да го украсат градот и да ја подигнат предновогодишната атмосфера во оваа време-невреме на пандемија со ковид – 19, или тоа да не го сторат.
