На Инфективната клиника на Клиничкиот и универзитетски центар на Косово денеска се пријавени шест нови случаи за кои постои сомнеж дека е можно да се заразени со корона вирусот.
Бројката на моментално хоспитализирани, за кои има сомнеж дека се носители на смртоносниот вирус Ковид-19, изнесува вкупно осум лица во цело Косово, изјави директорката на Клиниката, Лендита Ајвази-Бериша.
Таа кажа дека примероците од сите осуммина се дадени на анализа и резултатите ќе се знаат во наредните неколку часа и порача дека во моментов сепак нема потреба од вознемиреност.
Порталот „Газета експрес“ дознава дека сомнителните случаи се дојдени во Косово од С. Македонија, Швајцарија и Англија, но нема информација дали се работи за косовски или за државјани на земјите од каде допатувале.
Во Косово досега се забележани неколку случаи на лица за кои постоеше сомнеж дека се заразени со смртоносниот вирус, но анализите кај сите од нив беа негативни, односно во земјата официјално и натаму нема ниту еден носител на вирусот.
