-Видовме напредок во претходните години и се надевам дека така ќе продолжи, порача Могерини по средбата со српската премиерка Ана Брнабиќ во рамки на Советот за спроведување на Договорот за стабилизација и асоцијација меѓу ЕУ и Србија.
Шефицата на дипломатијата на ЕУ повтори дека позицијата на Брисел е јасна кога станува збор за царините и трансформацијата на косовските безбедносни сили.
-Повеќе пати побаравме од косовските власти да ги повлечат воведените царини. Предложивме Косово и Србија да одржат разговори кои ќе овозможат решавање на таквите прашања преку дијалог, а не со наметнување такси кои ги кршат договорите за слободна трговија, изјави Могерини.
Кога станува збор за формирањето „косовска војска“, таа истакна дека ставот на ЕУ е ист како тој на НАТО.
-Мандатот на косовските безбедносни сили може да се промени само преку инклузивен и постепен процес во согласност со косовскиот устав. Очекува од Косово да ги почитува своите законски обврски, особено во однос на Бриселскиот договор од април 2013 година и другите безбедносни аранжмани, кажа Могерини.
На прашањето како ги коментира обвинувањата на (косовскиот премиер Рамуш) Харадинај дека таа е крива за крахот на дијалогот, таа кажа дека на средбата со него не биле изнесени такви обвинувања.
Могерини изрази надеж дека Белград и Приштина ќе одберат искрено да се ангажираат на наоѓањето сеопфатно решение за сите отворени прашања еднаш засекогаш без оглед на тежината.
-За ЕУ перспективата која ја одбравте потребна е нормализација на односите и соочување со тешкотиите. Алтернативата на сериозниот дијалог во кој двете страни вистински се ангажираат е многу опасна. Не сакам ни да помислам што е алтернативата на дијалогот, заклучи Могерини.
