Демократската партија на Косово (ПДК), која по октомвриските избори премина во опозиција, одлучи да ја бојкотира денешната седница на Претседателството на Собранието, во знак на протест поради тоа што собраниската спикерка Вјоса Османи ја тргна фотографијата на претседателот Хашим Тачи во нејзиниот кабинет.
Шефот на пратеничката група на ПДК, Бедри Хамза, во изјава за медиумите оцени дека новата владејачка коалиција Движење Самоопределување (ВВ) – Демократски сојуз на Косово (ЛДК) – Српска листа (СЛ) „лошо ја почнала работата и институционалното однесување“.
Одговарајќи на изјавата на Османи дека на местото каде што претходно висеше сликата на Тачи ја ставила онаа на првиот претседател на независно Косово, Ибрахим Ругова, затоа што тоа бил човекот кој цел живот ја инспирирал, Хамза ѝ порача на Османи дека за инспирација служат приватните амбиенти и простории.
– Јас разбирам дека луѓето имаат потреба да се инспирираат, но за такви работи служат приватните амбиенти и простории. Во официјалните институции тоа е регулирано со закон. Фотографијата на претседателот Ругова се наоѓа во просториите на Собранието на Косово и додека Собранието го водеше лидерот на ПДК Кадри Весели таа се третираше со почит – изјави Хамза.
Тачи е основач на ПДК и ја водеше партијата до неговото именување за претседател на државата пред четири години, додека Ругова беше основач и лидер на ЛДК, чија потпретседателка е новата парламентарна спикерка.
По денешната седница на Претседателството на Собранието, Османи изјави дека не е информирана формално за бојкотот од партијата на Весели и нагласи дека сликата на Тачи не е отсранета од нејзиниот кабинет, туку само ѝ е сменето местото.
– Го сметам (бојкотот) за непотребен, бидејќи сликата на актуелниот претседател не е отсранета од кабинетот, туку е само поместена. Се наоѓа внатре во канцеларијата и е поставена на видливо место, само страната е сменета. Ги повикувам да дојдат и да придонесат за да ги водиме напред процесите кои се пред нас – изјави Османи.
На денешната седница на Претседателството на Собранието е одлучено да се формираат 14 собраниски комисии, коишто ќе ја ндгледуваат работата на 15 министерства, колку што има новата Влада на Косово предводена од лидерот на ВВ Албин Курти.
