Косовскиот премиер во оставка Рамуш Харадинај, по повод стапувањето на нови 337 војници во Безбедносните сили на Косово (ФСК), изјави дека Косово ја има најмладата војска според моделот на НАТО, посветена на безбедноста во земјата и стабилноста во регионот.
Според Харадинај, припадниците на ФСК се подготвени да учествуваат во мировни операции каде било во светот, односно таму каде што ќе побараат стратешките партнери на Косово.
– Денеска во редовите на мирот на Војската на Косово влегоа 337 нови војници, по успешното завршување на основната обука во Командата за доктрина и обука. Косово ја има најмладата војска според моделот на НАТО, посветена на безбедноста во земјата и стабилноста во регионот и спремна да учествува во мировни операции каде било во светот, кога и да побараат нашите стратешки партнери, Соединетите Американски Држави и структурите на Северноатлантскиот пакт. Војниците на Косово секогаш чесно во служба на мирот, за безбедна сегашност и иднина – напиша Харадинај на Фејсбук.
