Велигденските денови треба да се минат во домовите, со семејства, покажувајќи одговорност кон себе, своите најмили, општеството и државата Црна Гора, порача митрополитот на Црногорската православна црква Михаило.
„Во овие денови на голо искушение, должни сме да ги почитуваме и строго да се придржуваме до наредбите на Националниот координативен тим за заразни болести. Не одзивајте се на повиците на неодговорните и злонамерни свештеници од Белградската патријаршија, кои ги повикуваат верниците на литургија за Велигден. Се изложувате себе си, сопствените семејства и сите оние кои се во контакт со вас на опасноста од зараза со коронавирус, која може да заврши со тешки последици, па дури и смрт“, се наведува во велигденското послание на владиката Михаило.
Тој воедно потсети дека во Украина од коронавирус веќе починаа неколкумина монаси и еден владика, во Србија еден владика, а заразени се повеќе свештеници, додека во Италија починале стотици, пренесува РТЦГ.
„Останете во домовите со молитва на усните за сите оние кои деновиве се грижат за нас и нашето здравје, кои се подготвени и животите да ги дадат за да не одбранат нас и нашите најмили од опасната зараза. затворени во домовите, нашите срца нека останат отворени“, порача, меѓу другото, црногорскиот митрополит.
