Од Дебар замина групата лекари специјалисти, кои поради состојбата со коронавирусот, а во услови на потреба од дополнителен персонал, пристигна на 20 март.
Станува збор за инфектолог, педијатари и пулмолози, кои, како што на испраќањето, рече градоначалникот Хекуран Дука, заедно со нивните дебарски колеги, дадоа непроценлив придонес во заштитата на здравјето на жителите од оваа и општина Центар Жупа.
Текст на благодарност за докторите со нивна заедничка фотографија со градоначалникот Дука, секретарот на општината Или Мирзо и директорот на Општата болница, Баки Халили, стои и на официјалната веб страница на Општината.
-Хуманизмот што е во душата на лекарите не знае за никаква разлика. Целта е да му се помогне на најсовршеното битие на планетата – човекот. Благодарност од дебарани за докторите Зекерија од Слупчане, Славица од Велес, Бесим од Тетово, Вангел од Скопје и Армир од Скопје за пожртвуваноста за здравјето на дебрани. Вашите колеги и граѓаните од Дебар нема да ве заборават, стои во објавата.
Во Дебар, поточно во Општата болница, веќе пристигна втората група доктори, која е составена од инфектолог, педијатар и двајца пулмолози.
Во Дебар има еден епидемиолог и двајца инфектолози, а двајцата педијатри од приватната педијатриска амбуланта, кои дежураат и во итната помош, беа заразени, па повеќе од неопходно беше дополнителен број лекари. На барањето на Оперативниот штаб на градот позитивно одговори Министерството за здравство.
