ВМРО-ДПМНЕ ќе го испрати Договорот за промена на името меѓу Македонија и Грција за промена на името до Венециската комисија, изјави портпаролот на оваа партија Наум Стоилковски. Секое мислење на Венециската комисија е само советодавно, необврзувачко, но нивната рецензија е многу значајна во спроведувањето на одреден законски проект.
За ВМРО-ДПМНЕ договорот за промена на името на Република Македонија е неуставен, а потписниците на оваа спогодба сториле кртивично дело. Оваа опозициска партија пред два дена до Јавното обвинителство за организиран криминал и корупција поднесе кривична пријава против премиерот Зоран Заев, против Никола Димитров, Талат Џафери, како и против сите пратеници кои гласаа за „овој капитулантски, противуставен и противзаконски договор потпишан со Република Грција“.
Во кривичната пријава пријавените се гонат по четири основи за сторени кривични дела: велепредавство, загрозување на независноста, здружување заради непријателска дејност и за злоупотреба на службената положба и овластување.
Венециската комисија е советодавно тело на Советот на Европа. И покрај ветувањата, власта сѐ уште не го испрати Законот за употребата на јазиците до Венециската комисија. Сите забелешки и предлози на експертите на Венециската комисија на македонскиот Закон за употребата на јазиците ќе бидат прифатени и применети, велат од македонската Влада.
Поврзани вести
Владата се уште не ги разгледувала забелешките на Венецијанската комисија за Законот за употреба на јазиците
Избори во Црна Гора најверојатно ќе се одржат во септември
