Вакцинацијата против сезонски грип почнува од утре, а годинава се обезбедени 41.000 дози нови четривалентни вакцини. Од нив 28.000 дози, кои ги набави Министерството за здравство, се наменети за лицата над 65 години со просечна и потпросечна пензија и за оние што немаат пензија.
Овие вакцини ќе бидат бесплатни. Останатите 13.000 дози ги набавија центрите за јавно здравје, цената за нив е 650 денари, а за лицата со пензија помала од 14,480 денари ќе бидат бесплатни.
Четиривалентните вакцини против грип обезбедуваат заштита од четири типа на грип, односно од два вируси од типот А и од два вируси од типот Б. Досега вакцините против грип беа тривалентни, но по препорака на Светската здравствена организација развиени се новите вакцини, бидејќи двата типа на вирусот Б со различен интензитет биле присутни во различни периоди од годината во различни земји. Вакцините се набавени од француската фармацевтска компанија Санофи Пастер. Вакцинацијата против сезонски грип не е задолжителна, но таа се препорачува за лицата кои се хронично болни и се повозрасни.
-Вакцинацијата ќе се спроведе на тој начин што тие треба да се јават кај своите матични лекари да добијат уверение дека се здрави и од тука ќе бидат упатени во центрите за јавно здравје каде ќе се вакцинираат. Оваа година набавивме модерна вакцина четиривалентна, што значи штити од 4 видови на инфлуенца. Таа се набави според препораките на Светската здравствена организација- изјави Венко Филипче – Министер за здравство.
