Техничкиот премиер, Оливер Спасовски, ги повика граѓаните да не купуваат по голем број средства за дезинфекција затоа што на тој начин премногу брзо се трошат залихите и доста граѓани остануваат без можност да набават такви средства.
Спасовски изјави дека граѓаните кога ќе има одредена количина од овие средства купуваат по десет, 20 парчиња, но според него, секој треба да биде солидарен во овој момент и да се однесуваме одговорно со цел средства за дезинфекција да има за секого.
– Министерството за здравство врши набавка за потребите. Преземавме целосно дезинфекција на сите училишта, градинки, тоа ќе го направат службите на центарите за јавно здравје преку Министерството за здравство. Ги обезбедивме сите училишта претходно со средства за дезинфекција. Тоа што е потребно го правиме сега за обезбедување на сите можни средства и се врши дезинфекција на територијата на општините Центар Жупа и Дебар преку Дирекцијата за заштита и спасување. Се што има потреба, се што можеме ќе направиме во рамките на можностите. Сега засега нема загриженост за состојбата во овој дел, но да бидеме ирационални и одговорни во однос на тоа што го бараме – истакна Спасовски, одговарајќи на новинарско прашање.
