Собранието почна постапка за именување нов состав на Комисијата за инспекциски надзор

Поради застојот во избор на нов состав, вработените во стручната службата на оваа Комисија немаат земено плата пет месеци по ред, а немаат ниту здравствено и пензинско осигурување.Во писмото кое тие го испратија до „Макфакс“ се вели дека Комисијата е во катастрофална состојба, немаат никакви услови за работа, а хронично болните се оставени на милост и немилост бидејќи не можат да ја набават потребната терапија без здравственото осигурување, а лековите не можат да ги земат приватно бидејќи се оставени речиси половина година без плата.

Од страна на Комисијата за избори и именување како претседател на Државната комисија е предложена Елизабета Русеска, дипломиран правник од Охрид. Државната комисија за одлучување во втор степен во областа на инспекцискиот надзор и прекршочна постапка заедно со претседателот брои вкупно 7 члена, а како предлог од Комисијата за избори и именувања покрај Русеска како претседателка се најдоа и Искра Давитковска – Костова, правник од Скопје, Ристанка Лалчевска, дипломиран правник од Охрид, Мирјана Панајотова, дипломиран правник од Струмица, Неждет Винца, дипломиран инжинер по електротехника од Скопје, Шефки Јашари, дипломиран правник од тетовско Коларе и Ѓорги Чукарски дипломиран правник од Струмица.

Пленарната седница на која треба да се изгласа овој состав на Државната комисија за одлучување во втор степен во областа на инспекцискиот надзор и прекршочна постапка најверојатно ќе биде закажана за идната недела.

Стручната служба на оваа Државна комисија се состои од 24 административни службеници и 4 работници распоредени во 3 сектори или вкупно 28 работници од кои поголем дел не живеат во Скопје и се приморани секојдневно да патуваат до главниот град за да стигнат на работа што претставува дополнителен трошок за нив. Помеѓу овие 28 вработени, покрај хронично болни има и бремени жени кои треба да се породат, а сè уште немаат здравствено осигурување.