Заменик министерот за животна средина Макрадули потенцира дека 2019 ќе биде година во која ќе се работи на комплетна замена на нееколошките деривати за затоплување кај домаќинствата и јавните установи.
–Првата активност е поврзување на студентскиот дом Кузман Јосифовски Питу кој има 490 студенти, за жал се загрева на мазут и за тоа се трошат 230 тони штетни емисии во зимскиот период. Трошоците за мазут годишно се 7,1 милиони денари, изјави заменик министерот Јани Макрадули.
„Зелени ѕидови“ помеѓу училиштата и улиците, дводелни автобуси на гас, измени во законите за градење и домување – се само дел од останатите мерки на кои паралелно ќе се работи. Најспецифична а можеби и најтешка е потребата од подигнување на колективната свест, потенцира Макрадули кој побара помош од невладините организации и вети награди за оние кои ќе успеат во тоа.
-На јавната расправа која што се одржа во Собранието ни треба тоа – гласот на јавноста. Дека налепниците не се нешто што удира по сиромашните туку се грижи за екологијата. Дека забраната за греење на јаглен не е да удри по социјалните случаи туку напротив да го заштити здравјето на нивните деца. Но, државата треба да понуди алтернатива и овој план ја нуди таа алтернатива, изјави заменик министерот Јани Макрадули.
–Свесноста за тоа дека ова прашање ќе се решава во следните децении а не години мислам дека е дополнителен придонес на чувството на немоќ и незадоволство кај граѓаните, па и нивната агресивна критика кон институциите. Сето тоа е разбирливо имајќи предвид колку не се работеше на прашањето во изминатите 20 години, вели Ана Чоловиќ Лешоска, „Еко-свест“ .
Граѓанските организации побараа забрзување на процесот на гасификација, да се разгледа можноста да нема греење на дрвја во урбаните средини и да се обезбедат монтажни куќи за семејствата од скопските населби кои живеат под прагот на сиромаштијата.
