Собраниското мнозинство веќе ја подготви одлуката за распишување на референдумот. Извори во парламентот велат дека ќе се чека уште денеска и утре на договорот меѓу двајцата лидери Заев и Мицкоски за референдумското прашање.
Во спротивно потврдуваат дека одлуката на референдумот ќе се најде на понеделничката седница со референдумско прашање кое премиерот Заев во јавноста веќе го соопшти – Дали сте за членство во Европската унија и НАТО со прифаќање на договорот за името меѓу Македонија и Грција. Очекуваат поддршка и од опозициските Беса и Алијансата за Албанците.ВМРО ДПМНЕ и денеска остануваат на ставот дека сакаат референдумското прашање да биде едносмислено.
Во меѓувреме власта и опозицијата во пресрет на евентуалниот договор за прашањето кое ќе биде поставено на референдумот, со тешки обвинувања меѓу себе. Опозициската ВМРО-ДПМНЕ побара одговорност од СДСМ за како што пишува во нивното партиско соопштение – општиот грабеж. Побара оставки од функционерите вплеткани во скандалите со 45 милиони евра.
Заев се откажа од името, јазикот, историјата, идентитетот и македонското малцинство во соседството само за да си го отвори патот за себе и своите сопартијци за богатење врз грбот на граѓаните. Заев и СДСМ се откажаа од македонизмот само за да можат тој и неговата багра да ги бројат милионите на своите сметки спечалени на товар на државата. Правдата ќе ја вратиме стои во партиското соопштение на ВМРО-ДПМНЕ.
Според СДСМ пак ВМРО-ДПМНЕ и Христијан Мицкоски упорно одбиваат со црни сценарија да го поддржат успехот на Македонија и упорно се обидуваат да ја закочат македонската иднина. ВМРО-ДПМНЕ може да ги врати само парите од 11 годишниот грабеж, бидејќи правдата е одамна вратена и оти амнестија нема да има, пишува во партиското соопштение на СДСМ .
Опозициската ВМРО-ДПМНЕ воопшто да не се грижи, правдата е вратена, одговараат сите што го прекршиле законот, а парите се враќаат назад во буџетот. Доказ за тоа е пресудата против поранешниот премиер и претседател на ВМРО-ДПМНЕ Никола Груевски, како и пресудата против бизнис партнерот на Груевски, Сеад Кочан кој ќе врати незаконски стекнати 17 милиони евра назад во буџетот, стои во соопштението на СДСМ.
