Институтот за политички истражувања – Скопје, ги објави резултатите од истражувањето со наслов „Младинска религиска писменост“.
Истражувањето беше спроведено во Август на 1103 млади испитаници на возраст помеѓу 18 и 35 години, на ниво на целата држава по телефонски пат.
Четириесет и два отсто од младите целосно се согласуваат дека државата во целост ги почитува религиозните права и слободи на граѓаните, а 36 отсто нецелосно се согласуваат со ова тврдење.
Од вкупниот број испитаници 23 отсто сметаат дека доколку се загрозени религиозните слободи и права, институциите за заштита на тие права реагираат навремено и соодветно, донекаде се согласиле 25 отсто, делумно не се согласиле 21 отсто, додека воопшто не се согласиле 15 отсто од нив.
Според 48 отсто од испитаниците, институциите реагираат доколку се загрозени религиозните слободи, а 36 отсто сметале дека институциите не реагираат соодветно кога се загрозени религиозните права и слободи.
Резултатите од истражувањето покажуваат дека 51 отсто од испитаниците се изјасниле дека се сметаат за религиозни, додека дополнителни 34 отсто се изјасниле дека сметаат дека се донекаде религиозни, што вкупно претставува 85 отсто од сите млади граѓани меѓу 18 и 35 години.
Истражувањето го спровеле проф. д-р Тања Каракамишева Јовановска, проф. д-р Александар Спасеновски и проф. д-р Владимир Божиновски во соработка со Институтот за политички истражувања – Скопје.
