Министерот за надворешни работи, Бујар Османи, денеска ќе престојува во официјална посета на Црна Гора по покана на министерот за надворешни работи на Црна Гора, Ѓорге Радуловиќ.
За време на посетата Османи ќе има набиена агенда на која ќе оствари средби со целиот државен врв на земјата. Освен со својот колега, Османи ќе оствари средба и со претседателот на Црна Гора, Мило Ѓукановиќ, со претседателот на црногорскиот парламент Алекса Бечиќ, со претседателот на владата, Здравко Кривокапиќ, како и со потпретседателот на владата, Дритан Абазовиќ.
Се очекува на разговорите да бидат потврдени блиските и пријателски односи меѓу двете земји, но и детаљно разгледување на начините како да се продлабочи соработката, особено економската, која треба да ги следи многу добрите политички односи преку изнаоѓање нови форми и содржини за збогатување на трговската размена. Во споделувањето на мислењата и ставовите особено внимание ќе биде ставено на соработката во рамките на НАТО како земји сојузници и во процесот на интеграцијата во Европската Унија во која двете држави имаат заедничка цел и перспектива. Во тој контекст ќе се разговара и за регионалната соработка и иницијативи, кои имаат клучна улога во развојот на добрососедските односи и нивното значење за меѓусебната соработка и европската иднина на секоја земја поединечно и регионот како целина.
