Системот за безбедност на храната е функционален. Изминатата година не е евидентирано ниту едно труење, иако биле пријавени три случаи со 19 лица, соопшти директорот на Агенцијата за храна и ветеринарство (АХВ), Зоран Атанасов, оценувајќи дека ваквите резултати се солидни ако се земе превид дека во 2017 година 21 лице завршиле на болничко лекување, а лани 35.
Според Атанасов, минатата година во трите случаи причинителот не е потврден зашто пријавените 19 лица имале благи симптоми.
– Во светски рамки годишно се евидентираат по околу 600 милиони случаи на труење со храна, а од нив 430.000 завршуваат со смрт. Оттука, можеме да кажеме дека кај нас системот на безбедност на храната функционира и во него се вклучени сите инволвирани: потрошувачите, институциите, операторите со храна и лабораториите – изјави Атанасов на средба со новинарите.
Како што истакна Атанасов, за поефикасна и уште подобра контрола, како и за поголема безбедност на храната, АХВ вовела систем за брзо известување според европските стандарди, почнала да спроведува програма за контрола и превентива на одделни физички, хемиски и биолошки опасности во определени видови или категории храна, имплементирала мониторинг на храната третирана со јонизирачко зрачење, а почнала активно да работи и Националниот совет за безбедност на храната.
