Над 32 илјади вработени во образованието и науката од 1 јануари ќе добијат повисоки плати за 10 проценти. Според Спогодбата што ја потпишаа денеска Самостојниот синдикат на образование наука и култура (СОНК) и Министерството за образование и наука, повисоки плати ќе добијат околу 20.000 вработени во основното образование, 8.000 во средното, 4.500 во високото образование и 220 вработени во научните институции.
Министерот за образование Арбер Адеми изјави дека со оваа Спогодба се подобрува материјалниот статус на вработените во образованието, но најави дека и во следниот период ќе се работи на подобрување на дигнитетот на наставниците и професорите.
Од СОНК се задоволни од постигнатото за покачувањена платите, но она што останува да се сработи во следниот период е потпишување на колективен договор за високото образование, измени на колективните договори за основно и средно образование, враќање на регресот за годишен одмор, враќање на надоместокот за превоз за наставниците, кои одат на работа во руралните средини, како и плаќање на прекувремената работа.
