Мицкоски: Нема да газам по коските на илјадници генерации прифаќајќи нешто штетно со Бугарија

Претседателот на ВМРО-ДПМНЕ, Христијан Мицкоски на денешната прес-конференција истакна дека нема да гази по коските на илјадници генерации прифаќајќи нешто штетно со Бугарија.

Јас како човек и како политичар го немам правото, не сакам и нема да газам по коските на илјадници генерации, нема да газам по делото на Ченто, Апостолски, Мирче Ацев, Корчагин, Страшо, Стив Наумов и сите други херои. А ако предавството (или- штетен договор) се случи и има штетен договор со кој ќе се порекне македонски јазик, идентитет, историја, или постоење на македонско малцинство тогаш наредната Влада на ВМРО-ДПМНЕ тоа ќе го поништи. А Заев ќе дојде ден кога ќе одговара пред историјата и законите, рече Мицкоски.

Според него, нема Mакедонец ниту било кој граѓанин што и малку ја чуствуваа оваа земја како своја што не се чуствува понижено, навредено од сите оние изјави дека народот ни бил вештачки, дека јазикот е дрво без корен, туку така измислен 45тата година, дека нашите свети борци за слобода биле бугари и што уште не.

И сега треба да се правиме отсутни од реалноста и историските факти и да прифатиме дека тука имало бугарска администрација, а не окупаторска војска, фашистите да ги правиме ослободители и што уште не. Тоа боли, но уште повеќе боли тоа што владата и Заев молчи на сето ова и не одговара ниту демантира. Згора на тоа сведоци сме и на таен нон пејпер кој Владата не го коментира, ама го прифатила и притоа необјаснувајќи во чие име тоа го направила и со кого се консултирала за сето ова, рече Мицкоски.