„Макканабис“ со рок до Владата: Дозволете извоз на цвет од канабис, во спротивно излегуваме на протест

Здружението за одгледување на медицински канабис „Макканабис“ апелираат итно враќање на расправата по Предлог законот за контрола на опојни дроги и психотропни супстанции, со чии измени и надополнувања на одгледувачите ќе им се дозволи можноста за извоз на сув цвет.

– Тоа досега не го видовме. Би сакал да апелирам до Владата во најбрз можен  рок да го смени ако ништо друго, ако не успеат да го поминат законот како што беше предложен, да го сменат само еден член, а тоа  е член 36 , став 7  или став 1 не е битно каде ќе се инкриминира, битно е да се дозволи можноста за извоз на цвет, истакна законскиот застапник на Здружението, Костадин Дуковски, кој итноста ја аргументираше со се поголемите количини сув цвет од канабис што се во залиха кај најголемиот дел лиценцирани компании.

Тој ја нагласи итноста на законот и наведе примери како би можело тоа да се регулира, односно како државите во регионот, Грција, Малта, Португалија и Шпанија.

-Во ниедна држава нема таква можност  за да можеме да има забрана за извоз на цвет. Не е во такви  рамки како што е регулирано кај нас, меѓутоа би апелирал под итно да може да се дозволи  извозот на цвет под итна постапка, рече Дуковски.

Во овој бизнис, според застапникот на Здружението, повеќе македонски и странски компании вложиле над 150 милиони евра и вработени се околу 800 луѓе, што претставува бизнис кој брзо се развива со што ќе се зголеми и потребата за нови вработувања.

Дуковски апелираше Владата итно да го донесе законот бидејќи, како што рече, компаниите ќе претрпат големи загуби доколку не го извезат цветот од канабис, за кои не сакаше да каже за колкава количина се работи со образложение дека постои опасност од криминални структури да ги откријат магацините.

Од Здружението најавија дека доколку проблемот по итна постапка не биде решен во рок од седум дена ќе излезат на протести.