По истекот на предвидените 14 дена за карантин бројот на лицата од кочанскиот регион кои се наоѓаат во самоизолација денеска е намален за една четвртина и сега забраната за контакт со општествената средина важи за 108 граѓани.
Од општинскиот Кризен штаб информираа дека обврска за домашна изолација имаат 74 лица од Кочани, шест од Општина Зрновци и четири од Општина Чешиново-Облешево.
Под посебен третман во изолацијата се наоѓаат возачите и 24 од нив се од Кочани, а 10 од Чешиново-Облешево. Бројот на лица во изолација не се зголемува и поради отсуството на прилив на граѓани кои доаѓаат од други земји, информираат од Органот за внатрешни работи – Кочани.
Локалните служби ги продолжуваат активностите за спречување и намалување на ширењето на болеста КОВИД-19, а градоначалникот на Кочани, Николчо Илијев повика да се почитуваат новите мерки за ограничено движење на различните возрасни категории и сите да се однесуваат совесно, одговорно и грижливо кон јавното здравје.
Територијалната противпожарна единица од Кочани веќе изврши дезинфекција на 26 згради за колективно домување и на повеќе од 50 влезови во овие објекти, како и кај дел од јавните институции. За оваа активност се обезбедени пумпи и доволни количини средство за дезинфекција до највисоките катови, ракофатите на оградите на скалите и во лифтовите.
