Битиќи – Силвестри: Италија ќе продолжи да ја поддржува Македонија во ЕУ интеграциите

Заменикот на претседателот на Владата задолжен за економски прашања, координација со економските ресори и инвестиции, Фатмир Битиќи, се сретна со новоназначениот амбасадор на Република Италија во нашата земја, Андреа Силвестри, со кого разговараа за спроведувањето на пакетот анти-кризни мерки, досегашната економска соработка помеѓу двете земји и потенцијалите за продлабочување на истата.

Како што соопштија од кабинетот на Вицепремиерот, двајцата потенцираа дека економската соработка помеѓу двете земји е на солидно ниво, Република Италија е наш седми трговски партнер, а изразија очекување дека по завршување на кризата предизвикана од коронавирусот, трговскиот биланс ќе продолжи со позитивни стапки на раст.

Амбасадорот Силвестри, се наведува, подвлече дека Италија ќе продолжи да биде силен поддржувач на С. Македонија во евроинтеграции и дека ќе помогне во спроведување на реформите кои Владата ќе ги спроведува во наредните години.

Битиќи, пак, посочи дека Владата има сериозни намери да изработи долгорочен Национален развоен план, со кој ќе се дефинираат стратешките правци и политики во кои би се движела економијата во наредните 15-20 години. Тоа ќе придонесе за креирање на конзистетнтни политики и структурни реформи со кои ќе се обезбеди стабилност и предвидливост за бизнис секторот.

Вицепремиерот информираше и дека сега портфолиото за државна поддршка за инвестиции е во Кабинетот, а на тој начин ќе постои поголема координираност на државните органи за сите инвестиции во земјата. Тој додаде дека Владата продолжува со активности за привлекување на реномирани странски компании, да реализираат инвестиции во С. Македонија, како и дека ќе се засили грижата и кореспонденцијата со оние компании кои веќе работат во земјата. Паралелно, се поттикнуваат домашните компании да инвестираат во технолошки развој и иновации, со кои би биле поконкурентни на меѓународните пазари и би можеле да воспостават соработка со меѓународни корпорации да станат дел од вредносните ланци.

Вицепремиерот Битиќи и италијанскиот амбасадор Силвестри посочија дека економската соработка има потенцијал да расте и дека ќе направат напори таа да продолжи да се зголемува, стои во соопштението.