Активните случаи во Гостиварско се главно асимптоматски или пак имаат лесна клиничка слика е заклучокот на Кризниот штаб на Гостивар, Врапчиште и Маврово и Ростуше кој заседаваше и денеска.
Според Арбен Таравари кој раководи со штабот во наредниов период низ градот општински патроли ќе контролираат исто како и полицијата и инспекциските служби и ќе предупредуваат на непочитување на мерките за заштита.
– Мобилните екипи на општината започнаа да вршат контроли. Нивна задача е да проверуваат дали се почитуваат протоколите и препораките за заштита. Во меѓувреме на неколку граѓани им е укажано на носењето на заштитни маски, а доколку тоа не го направат ќе се соочат со казни, рече Таравари по 18 состанок на кризниот штаб.
Состојбата со ЈП „Комуналец” каде што беа откриени неколку позитивни случаи е нормализирана и работните обврски се одвиваат без застој, иако како што беше кажано, заради превенција неколку лица се испратени во двонеделна самоизлоација.
Во општина Гостивар сега има 14 активни случаи, во општина Врапчиште 13, а во Маврово и Ростуше 3. Во трите гостиварски општини од почетокот на пандемијата направени се 475 тестови од кои 51 лице имало позитивни резултати на Ковид-19 . Од нив 24 се во Гостивар, 22 во Врапчиште и пет во Маврово и Ростуше. Како последица од инфицирање со коронавирусот починаа три лица. За излекувани се водат 18 пациенти.
