Согласно препораките за заштита од корона вирусот, АД Бутел го намали од еден на половина час времето предвидено за изложување на починатите лица во капелите на Градските гробишта во Скопје.
-Презедовме мерки за што помалку директни контакти меѓу граѓаните, кои доаѓаат да присуствуваат на погребите. Една од препораките е да се изрази сочувство на најблиските и веднаш да ги напуштаат капелите и да се задржуваат на отворено и максимално да се избегнуваат меѓусебни контакти, велат од АД Бутел.
Обезбедени се средства за дезинфекција, а капеларите се задолжително со заштитна опрема. Заштитната опрема е задолжителна и за вработените во сите други служби за погребални услуги.
-Откако почна примената на мерките, досегашната пракса покажа дека има семејства и граѓани, кои доаѓаат подготвени, со маски, но има и такви, кои не се придржуваат до препораките. Апелираме до граѓаните да ги почитуваат правилата, што важат за групни собири, велат од АД Бутел.
