Во Македонија има околу 150 до 160 заболени од Хронична миелоична леукемија – ХМЛ, истакна денеска Пепо Леви, претседател на Здружението за помош на заболени од ХМЛ на одбележувањето на Меѓународниот ден на заболени од оваа хронична болест.
Леви изјави дека во 2007 година кога го основале здружението немало соодветни лекови за оваа болест, но додаде дека потпомогнати од докторите, здравствените власти обезбедиле соодветни лекови како тогашниот Тирозин киназе инхибитор од прва генерација, кој од 2011 година е ставен на позитивната листа на лекови.
– Од тогаш науката се развива брзо. Имаме втора и трета генерација Тирозин кеназе инхибитори. Во обид имаме и нов лек кој уште е во фаза на испитување и се надеваме дека за краток временски период овој лек ќе биде ставен во употреба. Во Северна Македонија има некаде 150 до 160 заболени од ХМЛ. Во текот на 2018 година преку Агенција за лекови, со посредство на Министерство за финансии и Клиниката за хематологија успеавме да го обезбедиме лекот Тасигна, втора генерација на Тирозин киназе инхибитори, кој не е ставен во позитивна листа на лекови. – изјави Леви, изразувајќи загриженост дека резерви на Тасигна има само за неколку месеци и дека многу пациенти заболени од оваа болест можат да останат без лекот.
Професорот Оливер Каранфилски изјави дека раното откривање на болеста веќе не е проблем и дека недостасуваат клинички студии.
– Ние, сите пациенти ги ставаме на терапија по сознание од поразвиените и подобрите од нас. Тоа што е тренд во светот од прилично одамна, бидејќи има опсервации кои траат веќе и седум-осум години, тоа е обидот за прекин на терапијата. Досега пеевме една песна дека терапијата со терозин киназе инхибитори, од која било генерација е доживотна терапија и со таква доживотна терапија оваа заболување престана да биде топ на интереси на хематолозите. Тоа престана да биде интересно, бидејќи најдовме лек за малигно заболување. – рече Каранфилски.
Доктор Божидар Кочоски истакна дека е жално тоа што голем број на пациенти се помлади од 50 години, односно се уште се во фаза на репродуктивен период.
– На нашите пациенти им овозможуваме да планираат и овозможуваат семејство. Има определени препораки кои се пратат во целиот тој процес. Редовното мониторирање ни е основна и клучна работа и во процесот на планирање на семејството. Пациентите со хронична ХМЛ може да имаат и нормално потомство. Во Македонија има пациенти кои со оваа болест станале родители. – изјави Кочоски.
