Магазин 04. февруари 2021. / 09:03

Се одбележуваат 149 години од раѓањето на Гоце Делчев

Се одбележуваат 149 години од раѓањето на Гоце Делчев

Големиот македонски револуционер Гоце Делчев е роден на денешен ден, 4 февруари 1872 година во Кукуш, во семејството на Султана и Никола.

Делчев се школувал во гимназијата во Солун и на Воената академија во Софија. Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата. Учествувал на Солунскиот конгрес на ВМРО (1896), а до 1901 година бил задграничен претставник на ВМРО во Софија.

По убиството во 1903-та, неговите посмртни останки се чувале во Баница, до 1917 година, кога биле пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков.

Останките на Делчев на 11 октомври 1946 година се пренесени во црквата „Свети Спас“ во Скопје.

Делегација на Собранието денеска ќе положи цвеќе на гробот на Гоце Делчев во црквата „Св. Спас“, по повод 149-годишнината од неговото раѓање.

Во состав на делегацијата, која ќе ја предводи потпретседател на Собранието Горан Мисовски, ќе бидат и Снежана Калеска-Ванчева и Велика Стојкова-Серафимовска.