Швајцарскиот актер Бруно Ганц, еден од најпознатите европски актери на сите времиња, почина вчера на 77-годишна возраст во Цирих. Ганц подолго време боледуваше од рак.
Тој беше меѓу најистакнатите актери од германското говорно подрачје, со долга и разновидна листа на улоги, а меѓународната репутација ја стекна глумејќи во „Падот“, но и со главната улога во „Небото над Берлин“. Играше Фауст, паднат ангел, па дури и Адолф Хитлер.
„Имам тенденција да се идентификувам со моите улоги до тој степен што се чини дека сум целосно убеден во одредени реплики“ изјавил Ганц.
На македонската јавност Ганц ѝ е познат по улогата во филмот „Сведок“ на Митко Панов.
Актерот во 2015 година беше награден со „Камера 300“ на битолскиот фестивал „Манаки“.
