Најголемата светска интернет продавница Амазон и понатаму е расадник на антиваксерските теории на заговор, а таквите дезинформации влијаат врз некои луѓе да одбиваат да се вакцинираат против коронавирусот, се истакнува во најновото истражување на научниците од Универзитетот Вашингтон во Сиетл.
Алгоритмите на Амазон за пребарување ги промовираат книгите кои шират лажни тврдења за вакцините пред оние кои ги побиваат здравствените дезинформации, утврдиле истражителите, а кога купувачите ги истражуваат, алгоритмите ги упатуваат на понатамошни дезинформации.
Амазон е „продавница со различни здравствени дезинформации“, предупредуваат авторите на истражувањето Прерна Џунеџа, докторантка на Факултет за информациски науки, и професорката по социјална информатика Тану Митра, во написот кој ќе биде претставен на научна конференција во мај.
Првите осум резултати на пребарувањето вчера за изразот „вакцина“ во интернет книжарницата на Амазон биле антиваксерски книги, вклучувајќи ја книгата „Секој што ќе ви каже дека вакцините се безбедни и ефикасни лаже“ на британскиот теоретичар на заговори Вернон Колман и книгата „План без вакцини“ на лекарот од Орегон Пол Томас.
На Томас минатата година му била одземена лиценцата поради лажење на родители околу безбедноста на вакцините и недоволно вакцинирање на пациентите поради што едно дете добило тетанус и во болница минало 57 дена.
Во контекст на масовното вакцинирање против ковид-19 „борбата против антиваксерските дезинформации никогаш не била поважна“, кажа Џунеџа.
– Амазон на купувачите им овозможува пристап до разни ставови. Посветени сме на обезбедување на позитивно искуство за купувачите и имаме политики кои дефинираат кои производи можат да се продаваат во нашите продавници, коментираше портпаролот на компанијата.
„Нашите алатки за купување и пребарување не се дизајнирани да генерираат резултати насочени на некој специфичен став и секогаш ги слушаме повратните информации од купувачите“.
Амазон неодамна постави оглас со линк до страницата на американската сојузна влада со факти за вакцините против ковид-19 над резултатите на пребарувањето за клучниот збор „вакцина“.
