Три возила се опожарени по полноќ во Скопје. Според полицијата, околу 00:20 часот во Секторот за внатрешни работи Скопје било пријавено дека на на паркинг-простор на улицата Боро Менков од засега непознати причини избувнал пожар во „застава“ чиј сопственик не е познат, а подолго време била оставена на паркингот.
Од пожарот, возилото целосно изгорело, а биле опожарени и „форд ескорд“, сопственост на Б.Л. од Скопје, кое било зафатено од левата страна, и „југо“, сопственост на Л.А. од Скопје, кое било опожарено од десната страна. Пожарот бил изгаснат од страна на Бригадата за противпожарна заштита. Увид ќе се врши во текот на денешниот ден.
