Жалам за настанот што се случи, го осудувам, но мора да истакнам дека македонската полиција реагираше веднаш и за неколку часа е утврден сторителот и изведен пред лицето на правдата. Тоа треба да биде поука бидејќи потпишување договор за работа на такви лица, кои не се достојни за полиција, беше одлика на некое друго време, изјави министерот за внатрешни работи Оливер Спасовски за свирепото убиство што во петокот го изврши 24-годишен припадник на полицијата.
По вчерашната произвика да понесе одговорност од опозициската ВМРО-ДПМНЕ утрово, рече, побарал информации кога полицаецот Енвер Тоска бил примен на работа.
– Сакам да ги информирам дека Митко Чавков е вистинската адреса каде треба да се обратат. ВМРО-ДПМНЕ го примила тој полициски службеник на работа во македонската полиција. И наместо да повикуваат на одговорност кон некој друг, нека се завртат кон себе и нека седнат во онаа бела зграда направена од маката на граѓаните на Македонија и нека одговорат кои се тие луѓе што придонесоа да се срами – не само македонската полиција, туку и македонската држава, рече Спасовски.
Во контекс на досегашните счучаи кога поединци ја уривале довербата во македонската полиција, го спомена прислушувањето во УБК, упадот во Собранието и најмногу од се, како што рече – начинот на кој биле примани кандидати за полициски службеници.
– Тоа значи дека треба да имаме и добри селекции, вистински правила кои треба да бидат испочитувани при прием во полиција, нагласи министерот за внатрешни работи, упатувајќи порака дека докрај ќе ја имаат неговата поддршка сите чесни и одговорни полицајци, но секој кој ќе го прекрши законот и правилата на службата ќе понесе сериозна одговорност.
Инаку Тоска го убил сопственикот на локална продавница, инаку негов пријател Бекир Алили со службениот пиштол, а потоа неговото тело го запалил.
Тоска откако бил приведен го признал злосторството.
