Еден месец по смртта на 13 годишното девојче Елмедина кое се удави во ископ полн со вода во општината Илинден, се уште не е утврдена одговорност.
На прашање од НОВА ТВ до каде е постапката и што утврди досегашниот тек на истрага,од Обвинителството одговорија:
„Веднаш по настанот е издадена наредба за обдукција на починатото лице, како и насоки за прибирање дополнителни податоци. Побарани се информации за фирмата која ги изведувала градежните работи и за текот на градбата. Во исто време, се прибираат податоци од инспекциските служби и од други надлежни органи за да се утврди евентуална кривична одговорност. Се очекува пристигнување на побараниот извештај од извршената обдукција, како и побараните податоци. По нивно разгледување и анализа ќе биде донесена јавно обвинителска одлука за натамошниот тек на постапката“, соопштија од Обвинителството за НОВА ТВ.
Речиси идентичен одговор стигна од Обвинителството и ден по трагедијата од каде тогаш информираа: „Побарани се информации за фирмата која ги изведувала градежните работи и за текот на градбата. Во исто време, се прибираат податоци од инспекциските служби и од други надлежни органи за да се утврди евентуална кривична одговорност“, соопштија од Јавното обвинителство на 4 јули, ден по трагичниот настан.
Детската игра заврши трагично кога девојчето според очевидци влегла во ископот полн со вода за да ги извлече братот и другарчето и се удави. Според жители на општина Илинден, ископот бил направен пред речиси цела година, а врнежите потоа го наполниле со вода. Но околу немало никаква заштитна ограда за да ги предупреди жителите на општината и да спречи влез до ископот.
Ограда беше поставена дури по трагичниот настан. Градоначалникот на Илинден Жика Стојановски за НОВА ТВ тогаш изјави дека „На местото требало да се градат станови, но инвеститорот немал градежна дозвола. Како општина очекуваме од сите градежни фирми да ја знаат и почитуваат процедурата согласно Законот за градење и другите закони. Во овој случај инспекторите утврдија дека не се почитувале елементарните услови“, рече Стојановски за НОВА ТВ.
Сепак, жителите на Општината бараат истрагата да се прошири и на инспекциските служби и да се утврди зошто дозволиле градежната парцела да остане необезбедна и покрај длабокиот ископ. Езерцето било со месеци во општината, а никој од реагирал да се обезбеди просторот. Пред дупката немало никаква табла, за тоа кој гради и што се гради, освен телефонски број за продажба на недвижности.
Дел од медиумите објавија дека двајцата сопственици се од Скопје, едниот бил сопственик и на агенцијата за недвижности што ги рекламира становите, а другиот помал локален стопанственик што се занимавал со градежен бизнис. Тие потврдиле дека не поднеле барање за градежна дозвола, зашто немале намера да градат, а рекламните паноа ги поставиле само за да покажат како би можела да изгледа зградата, ако се најдат инвеститори што би ја направиле.
Од Обвинителството нема дополнителни информации зошто еден месец по трагедијата истрагата се уште тапка во место – зошто Обвинителството се уште не ги обезбедило податоците „за фирмата која ги изведувала градежните работи, за текот на градбата и за инспекциските служби“.
