Собранието на Република Македонија вчера на првото продолжение на 45. седница го донесе Законот за финансиска поддршка на инвестициите.
Според пратеникот на СДСМ Бетијан Китев со овој закон СДСМ и коалицијата овозможија подобри и еднакви услови за поддршка на домашните и странските компании, со цел да се обезбедат економски раст, развој и повисоки плати.
-Пратениците од парламентарното мнозинство го усвоија Законот за финансиска поддршка, чија основна цел е преку поддршката на инвестициите да се зголеми конкурентноста на македонските компании, за тие да можат рамноправно да учествуваат и на меѓународниот пазар, изјави Китев.
Финансиските средства за поддршка на инвестициите ќе бидат обезбедени од Буџетот на Република Македонија, а за оваа 2018 година обезбедени се 18,3 милиони евра.
