Во месец април, Хелсиншкиот комитет за човекови права регистрирал 85 пријави за прекршувања на работничките права, кои опфатиле приближно 920 работници. Голем број од нив пријавиле дека одредени работодавачи и покрај сите препораки и мерки, ја злоупотребиле вонредната состојба и им ги откажале
договорите за вработување на цели групи вработени лица.
Поголемиот дел од работниците воопшто не добиле писмено известување за тоа, туку работодавачите
едноставно ги одјавиле од Агенцијата за вработување.
-Комитетот регистрираше 18 пријави за приближно 77 работници кои биле отпуштени од работа во текот на овој месец, но далеку позагрижувачки е бројот од 265 работници кои биле принудени да потпишат спогодби за раскинување на договорите за вработување. На овој начин, ним им беше оневозможен каков било пристап до заштитен механизам и тие останаа да се борат за „гола“ егзистенција на маргините на општеството, се вели во извештајот на Хелсиншки.
Уште еден удар за работниците, додаваат од комитетот, е неможноста да остварат паричен надоместок
во случај на невработеност поради тоа што работниот однос им престанал спогодбено.
Хелсиншки регистрира и дека во вората половина од април покрај тоа што се намалувале пријавите за
отпуштања од работа, забележан е раст на бројот на пријави од работници на кои платата не им била исплатена или им била намалена дури и за 50 проценти, незаконски повикувајќи се на институтот „виша сила“.
– Сојузот на синдикатите на Македонија (ССМ) бурно и будно реагираше со јасно видување дека одлуките на Владата со кои целосно се забрани работата на правните субјекти во одредени дејности, а поради спречување на ширењето на корона вирусот, не претставуваат виша сила, потенцираат од Хелсиншки.
Дополнително, регистрирано е дека и голем дел од работодавачите не ги почитувале мерките и препораките на Владата и на Министерството за здравство. Особено незаштитени и загрозени биле работниците во супермаркетите, продавачите и продавачките.
-Занемарувајќи ги трудовите правила за заштита и безбедност при работа, работодавачите не им обезбедија соодветна заштитна опрема, па тие ги остваруваа своите работни задачи изложувајќи се на сериозен ризик за своето здравје и живот. Притоа, тие не добија зголемување на платите соодветно, нотираат од комитетот.
Правна помош велат од Хелсиншки е побарано и во однос на правотото еден од родителите чии деца до десетгодишна возраст посетуваат настава во градинка или основно училиште, да биде ослободен од
обврската да ги извршува работните задачи.
